भेसळयुक्त पनीर आणि दुग्धजन्य पदार्थांविरोधात मोठी मोहीम राबवत प्रशासनाने पुण्यात तब्बल ४७ लाख ३६ हजार रुपयांचा संशयीत साठा जप्त केला आहे. यामध्ये २,८०६ किलो पनीर, १३,१२७ किलो खवा, १३८ किलो चीज ॲनलॉग आणि ९६० किलो तुपाचा समावेश आहे. 'सेफ फूड, सेफ ड्रग, सेफ महाराष्ट्र' मोहिमेअंतर्गत सोमवार पेठ, बुधवार पेठ, शुक्रवार पेठ, कोथरूड आणि हडपसर परिसरात ही कारवाई करण्यात आली असून खवा, पनीर, चीज ॲनलॉग आणि तूपाचे ३५ नमुने तपासणीसाठी घेण्यात आले आहेत.
केवळ पुण्यातच नव्हे, तर राज्यभरात प्रतिबंधित गुटखा आणि घातक पदार्थांविरोधात १ ते ५ जून या काळात १९५ छापे टाकून १९२ जणांना अटक करण्यात आली आहे. या मोहिमेत राज्यभरातून १ कोटी ९९ लाख १८ हजार ४७५ रुपयांचा प्रतिबंधित साठा जप्त करण्यात आला आहे. यासोबतच पिंपरी-चिंचवडमध्ये सहा व्यक्तींविरुद्ध एफआयआर दाखल करण्यात आला असून भारतीय न्याय संहितेच्या विविध कलमांनुसार ही कारवाई करण्यात आली.
Tags
pune